La giuventetgna è noss avegnir. Perquai èsi evident, che las spiertas da furmaziun attractivas e decentralas dal Grischun han da vegnir promovidas vinavant. Ultra da las scolas professiunalas spezialisadas e las scolas medias decentralas è er d’impurtanza la spierta da scolas autas orientadas a la pratica. Igl è necessari da furmar persunal qualifitgà che vegn duvrà sin ils divers secturs da l’economia grischuna e da porscher a quel scolaziuns da perfecziunament. La Scola auta spezialisada dal Grischun, la Scola auta pedagogica grischuna ed er las scolas spezialisadas superiuras dattan la tempra al Grischun sco chantun da scolaziun e perscrutaziun. La Vallada dal Rain Grischuna duai vegnir sviluppada vinavant, per ch’ella possia defender sia posiziun encunter las aglomeraziuns da la Bassa. Las ulteriuras regiuns han er da vegnir provedidas cun in stupent «service public», per ch’ellas restian attractivas sco lieus da lavurar, da viver e da sa recrear.

La cultura n’è nagin luxus, mabain ina materia prima indispensabla per noss chantun triling e multifar. La cultura destina noss mintgadi, creescha identitad, appartegnientscha ed è insumma l’elixir da nossa vita. Ella augmenta la qualitad da vita, rinforza la cuminanza e la coerenza aifer la populaziun. La promoziun da la cultura d’amaturs fitg multifaria e da la cultura professiunala è perquai da gronda impurtanza. Cun promover la transfurmaziun digitala dal portal dals bains culturals e da las basas linguisticas da la lingua rumantscha e taliana vegnan mess accents novs. Ensemen rendain nus vesaivla ed accessibla la cultura grischuna e la trilinguitad.

In grond giavisch èsi da mantegnair e promover las attractivas spiertas da sport en tut las regiuns dal chantun. Il moviment polivalent en las scolas, ils projects pertutgant il sport d’enviern ed il sport en il liber e la promoziun da pudair cumbinar la scola u la professiun cun il sport da prestaziun èn finamiras essenzialas. Ensemen pudain nus metter en pratica il concept davart la promoziun dal sport sin nivel communal, regiunal e chantunal.

Il Cussegl grond ha decidì ils 2019 il plan d’acziun «Green Deal per il Grischun» per contribuir sia part per ademplir las finamiras da la cunvegna da Paris pertutgant il clima. Quella decisiun prevesa, ch’il chantun bandunia l’energia fossila e favuriseschia funtaunas d’energia regenerabla. Las autas expensas d’enfin ussa per acquistar energia fossila duajan vegnir impundidas en l’economia grischuna per crear novs posts da lavur en branschas empermettentas. Per cuntanscher questa finamira èsi vegnì decidì d’augmentar la promoziun d’energias regenerablas, l’effizienza energetica, il traffic public, da prender mesiras per proteger il clima sin il sectur agricul e per s’adattar al clima che sa mida. Qua tras vegn rinforzada l’economia circulara ed igl è l’economia indigena che profitescha en tut las regiuns.