La mancanza da persunal qualifitgà daventa adina pli e pli ina da las pli grondas sfidas per l’economia grischuna. La problematica n’è betg specifica per tschertas branschas, mabain pertutga tut ils secturs e tut las branschas. D’elavurar schliaziuns en quest connex è in pensum communabel da tut ils acturs (interpresas, branschas, stadi) sin tut ils stgalims (local, regiunal, chantunal, naziunal) ed en tut ils secturs (producziun, industria, servetschs). Igl è il duair dal chantun da meglierar las cundiziuns generalas per ils lavurants entras augmentar la quota dal gudogn cun meglierar la cumpatibilitad da famiglia e professiun. La plazza economica grischuna ha alura success, sch’i vegn promovì las capacitads innovativas da las interpresas. Da muntada speziala èsi d’entretschar la perscrutaziun da basa, la retschertga en general, la scolaziun cun promover l’economia, il transfer da savida e tecnologia.

L’agricultura grischuna giauda in excellent renum grazia a sia gronda forza innovativa. Da trair a niz il potenzial existent en favur da l’entira chadaina da valurisaziun distingua l’agricultura grischuna. L’elavuraziun dals products primars agriculs en las valladas contribuescha ch’i vegn mantegnì plazzas da lavur en las vischnancas. Las mesiras per meglierar las structuras augmentan betg mo l’effizienza da la producziun agrara, mabain èn er in impurtant motor da l’economia en tut las regiuns. Igl è en spezial l’agricultura da muntogna che dependa dal sustegn dal maun public per pudair mantegnair er en avegnir la cultira tipica grischuna – la basa per noss turissem.

L’engaschament dal chantun per la promoziun tempriva sco era per ina politica activa en favur d’uffants e giuvenils è in’investiziun en l’avegnir da nossa giuventetgna. Ina nova norma legala duai porscher la pussaivladad al chantun ed a las vischnancas da furmar activamain ils svilups dals proxims onns pertutgant la politica d’uffants, da giuvenils e da famiglias per segirar uschia il futur dals uffants e giuvenils en il Grischun, purschend ad els bunas cundiziuns da viver e da sa sviluppar. La promoziun tempriva è la basa per ina vita en autonomia, independentamain da la derivanza socio-culturala.