Co vegn elegì?
Elecziuns da la Regenza
Las elecziuns constitutivas da la Regenza per la perioda d’uffizi dal 1. da schaner 2027 fin ils 31 da december 2030 han lieu dumengia, ils 14 da zercladur 2026. In eventual segund scrutini da las elecziuns da la Regenza è previs per la dumengia, ils 16 d’avust 2026.
Medemamain ils 14 da zercladur 2026 vegnan realisadas las elecziuns dal Cussegl grond per la perioda d’uffizi a partir da l’emprim di da la sessiun d’avust 2026 fin al cumenzament da la sessiun d’avust 2030.
La Regenza dal chantun Grischun che sa cumpona da tschintg commembras e commembers vegn elegida tenor la procedura electorala da maiorz. Elegids en l’emprim scrutini èn candidatas e candidats che cuntanschan la maioritad absoluta. Per calcular quest dumber vegn il dumber total da tut las vuschs valaivlas per persunas che candideschan dividì tras il dubel dumber dals sezs libers. La proxima cifra entira pli auta è la maioritad absoluta.
Cuntanschan passa tschintg candidatas e candidats il pli absolut, valan quellas e quels cun las pli bleras vuschs sco elegids. Sche main che tschintg candidatas e candidats cuntanschan il pli absolut, datti in segund scrutini liber. Elegids en quest segund scrutini èn quellas candidatas e quels candidats che han cuntanschì las pli bleras vuschs (maioritad relativa). En cas d’egualitad da las vuschs vegn tratg la sort.
Elecziuns dal Cussegl grond
Las elecziuns dal Cussegl grond per la perioda d’uffizi da l’emprim di da la sessiun d’avust 2026 fin al cumenzament da la sessiun d’avust 2030 vegnan realisadas dumengia, ils 14 da zercladur 2026.
Il Cussegl grond vegn elegì da nov en la procedura electorala da proporz (proporz). Partidas u gruppaziuns (gruppas da glistas) pon inoltrar propostas electoralas (glistas) en tuts u mo en singuls circuls electorals. Colliaziuns da glistas n’èn betg admissiblas. Cun lur cedel electoral pon las persunas cun dretg d’eleger dar maximalmain tantas vuschs sco quai ch’igl è d’eleger commembras e commembers dal cussegl grond en lur circul electoral. Mintga vusch per ina candidata u in candidat è a medem temp ina vusch per la gruppa da glistas respectiva. Ils sezs vegnan repartids tenor la metoda «Pukelsheim dubel» (procedura da repartiziun dals sezs dubla). Cun questa procedura vegnan ils 120 sezs repartids l’emprim en tut il chantun a las partidas/gruppas (gruppas da glistas) – proporziunalmain a lur quotas d’electuras ed electurs (attribuziun superiura). En in proxim pass vegnan ils sezs da las gruppas da glistas repartids sin las singulas glistas en ils circuls electorals (sutattribuziun). La finala vegnan ils sezs repartids entaifer las glistas sin las candidatas ed ils candidats cun las pli bleras vuschs a norma dals sezs cuntanschids.